ಬೆಟ್ಟದ ನೆಲ್ಲಿಕಾಯಿ - Gooseberry

ಬೆಟ್ಟದ ನೆಲ್ಲಿಕಾಯಿಯ ರುಚಿಕರ ಅಡುಗೆಗಳು

ನೆಲ್ಲಿಕಾಯಿಯು "ಸಿ" ಜೀವಸತ್ವದ ಗಣಿ. ಇದರಲ್ಲಿ ರಕ್ತಶೋಧಕ ಗುಣವಿದೆ. ಇದರ ಸೇವನೆಯಿಂದ ಆರೋಗ್ಯ ವರ್ಧಿಸುವುದು. ಆಯುಃ ಪ್ರಮಾಣ ಹೆಚ್ಚಾಗುವುದು. ಮೆದುಳಿಗೆ ಸಂಬಂಧಿಸಿದ ರೋಗಗಳಲ್ಲಿ ನೆಲ್ಲಿಕಾಯಿಯಿಂದ ತಯಾರಿಸಿದ ಯಾವುದೇ ವ್ಯಂಜನ ಉತ್ತಮ ತ್ರಾಣಿಕದಂತೆ ವರ್ತಿಸುವುದು. 



ನೆಲ್ಲಿಕಾಯಿ ಗೊಜ್ಜು


ಬೇಕಾಗುವ ವಸ್ತುಗಳು: 3-4 ನೆಲ್ಲಿಕಾಯಿ, 1 ಚಮಚ ಎಣ್ಣೆ, 1/2 ಚಮಚ ಸಾಸಿವೆ, 1 ಟೊಮೆಟೊ, 1/2 ಚಮಚ ಖಾರದ ಪುಡಿ, 1 ಚಮಚ ಸಾಂಬಾರು ಪುಡಿ, 1/4 ಚಮಚ ಮೆಂತೆ ಪುಡಿ, 1/4 ಚಮಚ ಸಾಸಿವೆ ಪುಡಿ, 1/4 ಚಮಚ ಅರಸಿನ ಪುಡಿ, 2 ಚಮಚ ಬೆಲ್ಲದ ಪುಡಿ, ರುಚಿಗೆ ತಕ್ಕಷ್ಟು ಉಪ್ಪು, ಕರಿಬೇವಿನೆಲೆ, 1 ಒಣಮೆಣಸು

ಮಾಡುವ ವಿಧಾನ: ನೆಲ್ಲಿಕಾಯಿ ತೊಳೆದು ಜಜ್ಜಿ ಬೀಜ ತೆಗೆದು, ತುಂಡುಮಾಡಿ, ಸ್ವಲ್ಪ ನೀರು ಹಾಕಿ ಬೇಯಿಸಿ. ನಂತರ ಬಾಣಲೆ ಒಲೆಯ ಮೇಲಿಟ್ಟು ಎಣ್ಣೆ ಹಾಕಿ. ಬಿಸಿಯಾದಾಗ ಸಾಸಿವೆ ಹಾಕಿ, ಸಿಡಿದಾಗ ಒಣಮೆಣಸು, ಕರಿಬೇವು ಹಾಕಿ ಸ್ವಲ್ಪ ಹುರಿದು, ನಂತರ ಸಾಂಬಾರು ಪುಡಿ, ಖಾರದ ಪುಡಿ, ಮೆಂತೆ ಪುಡಿ, ಸಾಸಿವೆ, ಅರಸಿನ, ಸ್ವಲ್ಪ ನೀರು ಹಾಕಿ ತೊಳಸಿ. ನಂತರ ಬೇಯಿಸಿದ ನೆಲ್ಲಿಕಾಯಿ ತುಂಡು, ಉಪ್ಪು, ಬೆಲ್ಲ ಹಾಕಿ 5-10 ನಿಮಿಷ ಕುದಿಸಿ. ನಂತರ ಒಲೆಯಿಂದ ಕೆಳಗಿಳಿಸಿ ಪಾತ್ರೆಗೆ ಹಾಕಿ ಕರಿಬೇವಿನಿಂದ ಅಲಂಕರಿಸಿ. ಆರೋಗ್ಯಕರವಾದ ಗೊಜ್ಜು ಅನ್ನದೊಂದಿಗೆ ಬಲುರುಚಿ.








ನೆಲ್ಲಕಾಯಿ - ಶುಂಠಿ ಚಟ್ನಿ


ಬೇಕಾಗುವ ವಸ್ತುಗಳು: 1-2 ನೆಲ್ಲಿಕಾಯಿ,  1/4" ಉದ್ದದ ಶುಂಠಿ, 1/4 ಚಮಚ ಜೀರಿಗೆ, 2-3 ಹಸಿಮೆಣಸು, 1 ಕಪ್ ಕಾಯಿತುರಿ, 1/2 ಚಮಚ ಸಾಸಿವೆ, 1 ಒಣಮೆಣಸು, 1/2 ಚಮಚ ಎಣ್ಣೆ, ರುಚಿಗೆ ತಕ್ಕಷ್ಟು ಉಪ್ಪು, ಕರಿಬೇವಿನೆಲೆ

ಮಾಡುವ ವಿಧಾನ: ನೆಲ್ಲಿಕಾಯಿ ತೊಳೆದು ಜಜ್ಜಿ ಬೀಜ ತೆಗೆದು, ಸಣ್ಣಗೆ ತುಂಡುಮಾಡಿ. ನಂತರ ಶುಂಠಿಚೂರು, ಹಸಿಮೆಣಸು ಕಾಯಿತುರಿ, ಉಪ್ಪು ಸೇರಿಸಿ, ನುಣ್ಣಗೆ ಗಟ್ಟಿಗೆ ರುಬ್ಬಿ. ನಂತರ ಎಣ್ಣೆಯಲ್ಲಿ ಸಾಸಿವೆ, ಒಣಮೆಣಸು, ಕರಿಬೇವು ಹಾಕಿ ಒಗ್ಗರಣೆ ಕೊಡಿ. ಗಂಜಿ, ದೋಸೆ, ಇಡ್ಲಿ ಜೊತೆ ತಿನ್ನಲು ರುಚಿ ಹಾಗೂ ಆರೋಗ್ಯದಾಯಕ.










ನೆಲ್ಲಿಕಾಯಿ ಹಲ್ವ


ಬೇಕಾಗುವ ವಸ್ತುಗಳು: 1 ಕಪ್ ನೆಲ್ಲಿಕಾಯಿಯ ಬೀಜ ತೆಗೆದ ತುಂಡುಗಳು, 1 ಕಪ್ ಬೆಲ್ಲದ ಪುಡಿ, 1/2 ಕಪ್ ತುಪ್ಪ, ಚಿಟಿಕಿ ಉಪ್ಪು, 1 ಚಮಚ ಏಲಕ್ಕಿ ಪುಡಿ.

ಮಾಡುವ ವಿಧಾನ: ನೆಲ್ಲಿಕಾಯಿ ತುಂಡುಗಳನ್ನು ಉಪ್ಪು ಹಾಕಿ ಬೇಯಿಸಿ ರುಬ್ಬಿ. ಬಾಣಲೆ ಒಲೆಯ ಮೇಲಿಟ್ಟು ಬೆಲ್ಲದ ಪುಡಿ ಮುಳುಗುವಷ್ಟು ನೀರು ಹಾಕಿ ಕರಗಿಸಿ. ನಂತರ ಸೋಸಿ ಬೇರೆ ಬಾಣಲೆಗೆ ಹಾಕಿ. ಸಣ್ಣ ಉರಿಯಲ್ಲಿ ಕುದಿಸಿ. ನೂಲುಪಾಕವಾದಾಗ ರುಬ್ಬಿದ ನೆಲ್ಲಿಕಾಯಿಯ ಮಿಶ್ರಣ ಹಾಕಿ. ನಂತರ ಕೈಬಿಡದೆ ಚೆನ್ನಾಗೆ ತೊಳಸಿ. ನಂತರ ತುಪ್ಪ ಹಾಕಿ. ಮಿಶ್ರಣ ಬಾಣಲೆಯಿಂದ ತಳಬಿಡುತ್ತಾ ಬಂದಾಗ ಏಲಕ್ಕಿ ಪುಡಿ ಹಾಕಿ ತುಪ್ಪ ಸವರಿದ ತಟ್ಟೆಗೆ ಹಾಕಿ. ಈಗ ಆರೋಗ್ಯಕರವಾದ ಹಲ್ವವನ್ನು ಸವಿದು ನೋಡಿ.










ನೆಲ್ಲಿಕಾಯಿ ಸಾಸಿವೆ


  

ಬೇಕಾಗುವ ವಸ್ತುಗಳು: 1/2 ಕಪ್ ತುರಿದ ನೆಲ್ಲಿಕಾಯಿ, 1/2 ಕಪ್ ಮೊಸರು, 1 ಈರುಳ್ಳಿ, 1 ಹಸಿಮೆಣಸು, 1 ಚಮಚ ತುಪ್ಪ, ರುಚಿಗೆ ತಕ್ಕಷ್ಟು ಉಪ್ಪು, 1/2 ಚಮಚ ಸಾಸಿವೆ, ಕರಿಬೇವಿನೆಲೆ

ಮಾಡುವ ವಿಧಾನ: ನೆಲ್ಲಿಕಾಯಿ ತುರಿಗೆ ಮೊಸರು, ಸಣ್ಣಗೆ ಹೆಚ್ಚಿದ ಈರುಳ್ಳಿ, ಹಸಿಮೆಣಸು ಚೂರು ಹಾಕಿ ಸರಿಯಾಗಿ ಬೆರೆಸಿ. ಉಪ್ಪು ಹಾಕಿ. ನಂತರ ತುಪ್ಪದಲ್ಲಿ ಸಾಸಿವೆ, ಕರಿಬೇವಿನೆಲೆ ಒಗ್ಗರಣೆ ಕೊಡಿ.  

ಕಷಾಯಗಳು

ಚಳಿಗಾಲದ ಆರೋಗ್ಯಕರ ಕಷಾಯಗಳು

ಚಳಿಗಾಲದ ಶೀತ ಹವೆಗೆ, ತಲೆಭಾರ, ಗಂಟಲು ಕೆರೆತ, ಸೈನಸೈಟೀಸ್ ಸಮಸ್ಯೆಗಳು ಕಾಣಿಸಿಕೊಳ್ಳುತ್ತವೆ. ಈ ಕಷಾಯಗಳನ್ನು ಆಗಾಗ ಮಾಡಿ ಸೇವಿಸುತ್ತಿದ್ದರೆ ದೇಹದ ರೋಗನಿರೋಧಕ ಶಕ್ತಿ ಆರೋಗ್ಯ ಸುಧಾರಿಸುತ್ತದೆ. ಮನೆಯಲ್ಲಿಯೇ ಸಿಗುವ ವಸ್ತುಗಳನ್ನು ಉಪಯೋಗಿಸಿ ಮಾಡಬಹುದಾದ ಕಷಾಯಗಳ ಪರಿಚಯ ಇಲ್ಲಿದೆ.

ಕೊತ್ತಂಬರಿ - ಜೀರಿಗೆ - ಜೇಷ್ಠಮಧು ಕಷಾಯ


ಬೇಕಾಗುವ ವಸ್ತುಗಳು: 1/2 ಚಮಚ ಕೊತ್ತಂಬರಿ, 7-8 ಕಾಳುಮೆಣಸು, 1/2 ಚಮಚ ಜೇಷ್ಠಮಧು ಪುಡಿ, 1/2 ಚಮಚ ಒಣಶುಂಠಿ ಪುಡಿ, 1/2 ಚಮಚ ಜೀರಿಗೆ, 1 ಲೋಟ ಹಾಲು, 1 ಚಮಚ ಬೆಲ್ಲ

ಮಾಡುವ ವಿಧಾನ: 1 ಕಪ್ ನೀರು ಪಾತ್ರೆಗೆ ಹಾಕಿ ಒಲೆಯ ಮೇಲಿಟ್ಟು ಕುದಿಸಿ. ಕೊತ್ತಂಬರಿ, ಕಾಳುಮೆಣಸು, ಜೀರಿಗೆ ಸ್ವಲ್ಪ ಬೆಚ್ಚಗೆ ಹುರಿದು ಪುಡಿ ಮಾಡಿ ಕುದಿಯುತ್ತಿರುವ ನೀರಿಗೆ ಹಾಕಿ ತೊಳಸಿ. ನಂತರ ಬೆಲ್ಲ ಹಾಲು ಹಾಕಿ 10-15 ನಿಮಷ ಕುದಿಸಿ. ಶುಂಠಿ ಪುಡಿ, ಜೇಷ್ಠಮಧು ಪುಡಿ ಹಾಕಿ 5 ನಿಮಿಷ ಕುದಿಸಿ ಕೆಳಗಿಳಿಸಿ. ನಂತರ ಸೋಸಿ ಹಾಲು ಬೆರೆಸಿ ಕಪ್ ಗೆ ಹಾಕಿ ಕುಡಿಯಿರಿ. ಚಳಿಗಾಲದ ಶೀತ, ಗಂಟಲು ನೋವು, ಜ್ವರ, ಕೆಮ್ಮು, ದಮ್ಮಿಗೆ ಈ ಕಷಾಯ ಒಳ್ಳೆಯದು.





ಅಮೃತಬಳ್ಳಿಯ ಕಷಾಯ


ಬೇಕಾಗುವ ವಸ್ತುಗಳು: ಅಮೃತಬಳ್ಳಿಯ 1 ಇಂಚು ಉದ್ದದ ತುಂಡು, 1/4 ಇಂಚು ಉದ್ದದ ಜೇಷ್ಠಮಧು, 1 ಚಮಚ ಜೀರಿಗೆ, 5 ತುಳಸಿ ಎಲೆ, 2 ಚಮಚ ಜೇನುತುಪ್ಪ

ಮಾಡುವ ವಿಧಾನ: ಅಮೃತಬಳ್ಳಿಯ ತುಂಡು ಜಜ್ಜಿ, 2 ಕಪ್ ನೀರು ಪಾತ್ರೆಗೆ ಹಾಕಿ ಒಲೆಯ ಮೇಲಿಟ್ಟು, ಜಜ್ಜಿದ ಜೇಷ್ಠಮಧು, ಜೀರಿಗೆ, ತುಳಸಿ ಎಲೆ ಹಾಕಿ ಚೆನ್ನಾಗಿ ಕುದಿಸಿ, 1 ಕಪ್ ಗೆ ಇಳಿಸಿ ನಂತರ ಸೋಸಿ ಕಪ್ ಗೆ ಹಾಕಿ. ಜೇನುತುಪ್ಪ ಸೇರಿಸಿ ಬಿಸಿಬಿಸಿಯಾಗಿ ಸೇವಿಸಿ. ಈ ಕಷಾಯ ಜ್ವರ, ಶೀತ, ನೆಗಡಿಯನ್ನು ನಿಯಂತ್ರಿಸುತ್ತದೆ.







ಶುಂಠಿ ಕಷಾಯ


ಬೇಕಾಗುವ ವಸ್ತುಗಳು: 1 ಇಂಚು ಉದ್ದದ ಶುಂಠಿ, 2 ಕಪ್ ನೀರು, ಒಂದುವರೆ ಚಮಚ ಬೆಲ್ಲ, 1/4 ಕಪ್ ಹಾಲು

ತಯಾರಿಸುವ ವಿಧಾನ: ಶುಂಠಿ ತೊಳೆದು ಜಜ್ಜಿ, ಎರಡು ಕಪ್ ನೀರು ಹಾಕಿ, ಕುದಿಸಿ. ನಂತರ ಬೆಲ್ಲ ಹಾಕಿ ಹತ್ತು ನಿಮಿಷ ಕುದಿಸಿ ಕೆಳಗಿಳಿಸಿ. ಬಳಿಕ ಶೋಧಿಸಿ ಬಿಸಿಹಾಲು ಸೇರಿಸಿ ಬಿಸಿಯಿರುವಾಗಲೇ ಕುಡಿಯಿರಿ. ಗಂಟಲು ಕೆರೆತ, ಶೀತ, ಸೈನಸೈಟೀಸ್, ತಲೆಭಾರ ಈ ಸಮಸ್ಯೆಗಳಿಗೆ ಈ ಕಷಾಯ ಒಳ್ಳೆಯದು.







ದೊಡ್ಡಪತ್ರೆ ಕಷಾಯ


ಬೇಕಾಗುವ ವಸ್ತುಗಳು: 3-4 ದೊಡ್ಡಪತ್ರೆ ಎಲೆ, 1/2 ಚಮಚ ಜೀರಿಗೆ, 1/2 ಚಮಚ ಕಾಳುಮೆಣಸು, 2 ಚಮಚ ಜೇನುತುಪ್ಪ

ಮಾಡುವ ವಿಧಾನ: ಜೀರಿಗೆ, ಕಾಳುಮೆಣಸು ಪುಡಿಮಾಡಿ, 1 ಕಪ್ ನೀರಿಗೆ ತೊಳೆದ ದೊಡ್ಡಪತ್ರೆ ಎಲೆ, ಪುಡಿಮಾಡಿದ ಕಾಳುಮೆಣಸು, ಜೀರಿಗೆ ಪುಡಿ ಹಾಕಿ ಮುಚ್ಚಿ, 1 ನಿಮಿಷ ಕುದಿಸಿ ಇಳಿಸಿ. ನಂತರ ಮಿಕ್ಸಿಗೆ ಹಾಕಿ ರುಬ್ಬಿ. ನಂತರ ಪುನಹ ಪಾತ್ರೆಗೆ ಹಾಕಿ ಸ್ವಲ್ಪ ನೀರುಹಾಕಿ ಮುಚ್ಚಿ ಕುದಿಸಿ ನಂತರ ಒಲೆಯಿಂದ ಇಳಿಸಿ ನಂತರ ಸೋಸಿ ಜೇನುತುಪ್ಪ ಹಾಕಿ ಕುಡಿಯಿರಿ. ಕೆಮ್ಮು, ದಮ್ಮು, ಉಬ್ಬಸ, ಅಜೀರ್ಣ ಮುಂತಾದ ತೊಂದರೆಗಳ ಶಮನಕ್ಕೆ ಒಳ್ಳೆಯದು.





ನೀರುಳ್ಳಿ ಕಷಾಯ


ಬೇಕಾಗುವ ವಸ್ತುಗಳು: 1 ನೀರುಳ್ಳಿ, 1 ಚಮಚ ಜೀರಿಗೆ, 1 ಕಪ್ ನೀರು, ಸಣ್ಣ ತುಂಡು ಬೆಲ್ಲ

ಮಾಡುವ ವಿಧಾನ: ಒಲೆಯ ಮೇಲೆ ಪಾತ್ರೆಯಿಟ್ಟು ನೀರುಹಾಕಿ ನೀರುಳ್ಳಿ ಜೀರಿಗೆ ಹಾಕಿ ಸ್ವಲ್ಪ ಕುದಿದ ಮೇಲೆ ಇಳಿಸಿ, ಮಿಕ್ಸಿಗೆ ಹಾಕಿ ರುಬ್ಬಿ. ಪುನಹ ಒಲೆಯ ಮೇಲಿಟ್ಟು ಸ್ವಲ್ಪ ಬತ್ತುವ ತನಕ ಕುದಿಸಿ. ನಂತರ ಶೋಧಿಸಿ ಗ್ಲಾಸಿಗೆ ಹಾಕಿ ಕುಡಿಯಿರಿ. ಶೀತ ಕೆಮ್ಮಿಗೆ ಇದು ರಾಮಬಾಣ.








ಒಂದೆಲಗದ ಕಷಾಯ


ಬೇಕಾಗುವ ವಸ್ತುಗಳು: ಒಂದು ಹಿಡಿ ಬೇರು ಸಹಿತ ಒಂದೆಲಗದ ಎಲೆ, 1 ಚಮಚ ಕಾಳುಮೆಣಸು ಪುಡಿ, 2 ಚಮಚ ಜೇನುತುಪ್ಪ

ಮಾಡುವ ವಿಧಾನ :  2 ಕಪ್ ನೀರಿಗೆ ಬೇರು ಸಹಿತ ಸ್ವಚ್ಛವಾಗಿ ತೊಳೆದ ಒಂದೆಲಗದ ಎಲೆ, ಕಾಳುಮೆಣಸು ಪುಡಿಹಾಕಿ ಚೆನ್ನಾಗಿ 1 ಕಪ್ ಆಗುವಷ್ಟು ಕುದಿಸಿ. ನಂತರ ಇಳಿಸಿ ಶೋಧಿಸಿ, ಜೇನು ಹಾಕಿ ಸರಿಯಾಗಿ ಬೆರೆಸಿ, ಬಿಸಿಬಿಸಿಯಾಗಿ ಕುಡಿಯಿರಿ. ಇದು ಜ್ವರ ನೆಗಡಿಗಳಿಗೆ ಉತ್ತಮ ಪರಿಹಾರ.




ಕ್ಯಾರೆಟ್

ಕ್ಯಾರೆಟ್ ನ ಅಡುಗೆ

ಕ್ಯಾರೆಟ್ ಶಕ್ತಿವರ್ಧಕ ತರಕಾರಿ. ಇದನ್ನು ಸದಾಕಾಲ ಸೇವಿಸುತ್ತಿದ್ದಲ್ಲಿ ಪಚನಾಂಗಗಳಲ್ಲಿ ಹುಟ್ಟುವ ಅನೇಕ ರೋಗಗಳಿಂದ ಮುಕ್ತರಾಗಬಹುದು. ಕಣ್ಣು, ನರಮಂಡಲ, ಪಿತ್ತಕೋಶ, ಶ್ವಾಸಕೋಶ, ಮೂತ್ರಪಿಂಡಗಳು ಮತ್ತು ಹೃದಯಕ್ಕೆ ಸಂಬಂಧಿಸಿದ ಅನೇಕ ರೋಗಗಳಲ್ಲಿ ಹೆಚ್ಚು ಗುಣ ಕಂಡುಬರುವುದು. ದೇಹದಲ್ಲಿ ರೋಗನಿರೋಧಕ ಶಕ್ತಿ ಹೆಚ್ಚಾಗುವುದು.

ಕ್ಯಾರೆಟ್ ದೋಸೆ


ಬೇಕಾಗುವ ವಸ್ತುಗಳು: 1 ಕಪ್ ಬೆಳ್ತಿಗೆ ಅಕ್ಕಿ,  3 -4 ಕ್ಯಾರೆಟ್ ತುರಿ, 1/4 ಕಪ್ ಕಾಯಿತುರಿ, ರುಚಿಗೆ ತಕ್ಕಷ್ಟು ಉಪ್ಪು, 2 ಚಮಚ ನಿಂಬೆರಸ, 2 - 3 ಚಮಚ ಎಣ್ಣೆ

ಮಾಡುವ ವಿಧಾನ: ಬೆಳ್ತಿಗೆ ಅಕ್ಕಿಯನ್ನು 2 - 3 ಗಂಟೆ ನೆನೆಸಿ. ನಂತರ ಚೆನ್ನಾಗಿ ತೊಳೆದು ಕ್ಯಾರೆಟ್ ತುರಿ, ಕಾಯಿತುರಿ, ಉಪ್ಪು ಸೇರಿಸಿ ನುಣ್ಣಗೆ ರುಬ್ಬಿ. ನಂತರ ನಿಂಬೆರಸ ಸೇರಿಸಿ 5 - 10 ನಿಮಿಷ ಇಡಿ. ನಂತರ ತವಾ ಒಲೆಯ ಮೇಲಿಟ್ಟು ಎಣ್ಣೆಪಸೆ ಮಾಡಿ. 1 ಸೌಟು ಹಿಟ್ಟು ಎರೆದು ತೆಳ್ಳಗೆ ಹರಡಿ ಮುಚ್ಚಿ. ಬೆಂದಾಗ ಕವುಚಿ ಹಾಕಿ ತೆಗೆಯಿರಿ. ಈಗ ಆರೋಗ್ಯಕರವಾದ ದೋಸೆ ಸವಿಯಲು ಸಿದ್ಧ.






ಕ್ಯಾರೆಟ್ ರೊಟ್ಟಿ


ಬೇಕಾಗುವ ವಸ್ತುಗಳು: 1 ಕಪ್ ಬೆಳ್ತಿಗೆ ಅಕ್ಕಿ,  2 ಕ್ಯಾರೆಟ್ ತುರಿ, 1/4 ಕಪ್ ಕಾಯಿತುರಿ, 1 - 2 ಹಸಿಮೆಣಸು, 1 ಈರುಳ್ಳಿ, ಚಿಟಿಕಿ ಅರಸಿನ, 1/2 ಕಪ್ ಮೊಸರು, ರುಚಿಗೆ ತಕ್ಕಷ್ಟು ಉಪ್ಪು, 2 ಚಮಚ ತುಪ್ಪ

ಮಾಡುವ ವಿಧಾನ: ಅಕ್ಕಿಯನ್ನು ೨-೩ ಗಂಟೆ ನೆನೆಸಿ ತೊಳೆದು ತರಿತರಿಯಾಗಿ ರುಬ್ಬಿ. ನಂತರ ಕ್ಯಾರೆಟ್ ತುರಿ, ತೆಂಗಿನ ತುರಿ, ಹಸಿಮೆಣಸು ಚೂರು, ಈರುಳ್ಳಿ ಚೂರು, ಅರಸಿನ, ಉಪ್ಪು, ಮೊಸರು ಸೇರಿಸಿ ಕಲಸಿ. ತವಾ ಒಲೆಯ ಮೇಲಿಟ್ಟು ಬಿಸಿಯಾದಾಗ ೧ ಸೌಟು ಹಿಟ್ಟು ಹಾಕಿ ಹರಡಿ ಮುಚ್ಚಿಡಿ. ನಂತರ ತುಪ್ಪ ಹಾಕಿ ಎರಡೂ ಬದಿ ಚೆನ್ನಾಗಿ ಬೇಯಿಸಿ. ರುಚಿಯಾದ ಪೌಷ್ಠಿಕ ರೊಟ್ಟಿಯನ್ನು ಚಟ್ನಿಯೊಂದಿಗೆ ಸವಿಯಿರಿ.





ಕ್ಯಾರೆಟ್ ಉಂಡೆ


ಬೇಕಾಗುವ ವಸ್ತುಗಳು: 2 ಕಪ್ ಕ್ಯಾರೆಟ್ ತುರಿ, 1 ಕಪ್ ಚಿರೋಟಿ ರವೆ,  ಒಂದುವರೆ ಕಪ್ ಸಕ್ಕರೆ ಪುಡಿ, 10-12 ಗೋಡಂಬಿ, 11-12 ಒಣದ್ರಾಕ್ಷೆ, 1/4 ಕಪ್ ತುಪ್ಪ,  1/2 ಚಮಚ ಏಲಕ್ಕಿ ಪುಡಿ

ಮಾಡುವ ವಿಧಾನ: ಬಾಣಲೆ ಒಲೆಯ ಮೇಲಿಟ್ಟು ಸ್ವಲ್ಪ ತುಪ್ಪ ಹಾಕಿ ಕ್ಯಾರೆಟ್ ತುರಿ ಹಾಕಿ ಸ್ವಲ್ಪ ಹುರಿದು ಕೆಳಗಿಳಿಸಿ. ನಂತರ ಗೋಡಂಬಿ ದ್ರಾಕ್ಷಿ ತುಪ್ಪದಲ್ಲಿ ಹುರಿದು ಸಕ್ಕರೆ ಪುಡಿ, ಏಲಕ್ಕಿ ಪುಡಿ, ಹುರಿದ ಕ್ಯಾರೆಟ್, ಹುರಿದ ರವೆ ಎಲ್ಲಾ ಬೆರೆಸಿ, ಬಿಸಿಯಿರುವಾಗಲೇ ಉಂಡೆ ಮಾಡಿ. ರುಚಿಯಾದ ಈ ಉಂಡೆಯನ್ನು ಮಕ್ಕಳು ಇಷ್ಟಪಟ್ಟು ತಿನ್ನುತ್ತಾರೆ.

ಮಾಂಬಳ

ಮಾಂಬಳದಲ್ಲಿ ರುಚಿಕರ ಅಡುಗೆಗಳು

ಮಾವಿನ ಹಣ್ಣು ತುಂಬಾ ಆಗುವ ಕಾಲದಲ್ಲಿ, ಚೆನ್ನಾಗಿ ಬಲಿತ ಸಿಹಿ ಕಾಡು ಮಾವಿನಹಣ್ಣುಗಳನ್ನು ತೊಟ್ಟು ತೆಗೆದು, ತೊಳೆದು ರುಬ್ಬುವ ಕಲ್ಲಿನಲ್ಲಿ ಸಿಪ್ಪೆ ಮತ್ತು ಐಜೆಯನ್ನು ಹಾಕಿ ಮರದ ಕುಟ್ಟಾನಿಯಲ್ಲಿ ಕುಟ್ಟಿ ನಂತರ ಹಿಂಡಿ ರಸ ತೆಗೆದು, ಚಾಪೆ ಅಥವಾ ಮೊರದ ಮೇಲೆ ಬಿಳಿ ಬಟ್ಟೆ ಹಾಕಿ ಹಿಂಡಿದ ರಸ ಹಾಕಿ ಹರಡಿ ಬಿಸಿಲಿಗೆ ಎತ್ತರದ ಜಾಗದಲ್ಲಿಟ್ಟು 6 ದಿವಸ ಇಡಿ. 7ನೇ ದಿನ ಬೆಳಿಗ್ಗೆ ಬಟ್ಟೆಯಿಂದ ಮಾಂಬಳ ಮೆತ್ತಗೆ ತೆಗೆದು, ಮೊರಕ್ಕೆ ಬೇರೆ ಬಟ್ಟೆ ಹಾಕಿ ಕವುಚಿ ಹಾಕಿ. ಎರಡು ದಿನ ಮೇಲಿನ ಬದಿಗೆ ರಸ ಹಾಕಿ ಹತ್ತು ಬಿಸಿಲು ಒಣಗಿಸಿ. ನಂತರ ಮೂರುವರೆ ಇಂಚು ಚೌಕದ ತುಂಡು ಮಾಡಿ ಪೋಲಿಥಿನ್ ಕವರ್ ನಲ್ಲಿ ಹಾಕಿ ಡಬ್ಬದಲ್ಲಿ ಇಟ್ಟರೆ ಎರಡು ವರ್ಷಕ್ಕೂ ಕೆಡದು. ಸಣ್ಣ ಮಕ್ಕಳು ಚಾಕಲೇಟಿನಂತೆ ತಿನ್ನಲು ಇಷ್ಟಪಡುತ್ತಾರೆ.

ಮಾಂಬಳ ಸಾಸಿವೆ 


ಬೇಕಾಗುವ ವಸ್ತುಗಳು: 1/2 ಕಪ್ ಹೆಚ್ಚಿದ ಮಾಂಬಳ,  1 1/2 ಕಪ್ ತೆಂಗಿನ ತುರಿ, 1/4 ಕಪ್ ಬೆಲ್ಲ,  1 ಚಮಚ ಸಾಸಿವೆ, 1 ಒಣಮೆಣಸು, ರುಚಿಗೆ ತಕ್ಕಷ್ಟು ಉಪ್ಪು.
ಮಾಡುವ ವಿಧಾನ: ಮಾಂಬಳವನ್ನು 1/2 ಕಪ್ ನೀರು ಹಾಕಿ ಬೆಲ್ಲ ಮತ್ತು ಉಪ್ಪು ಹಾಕಿ ಚೆನ್ನಾಗಿ ಕಿವುಚಿ ಇಡಿ. ನಂತರ ತೆಂಗಿನ ತುರಿ, ಸಾಸಿವೆ, 1 ಒಣಮೆಣಸು ಸೇರಿಸಿ ನುಣ್ಣಗೆ ರುಬ್ಬಿ, ಕಿವುಚಿಟ್ಟ ಮಾಂಬಳಕ್ಕೆ ಬೆರೆಸಿ. ಈಗ ರುಚಿಯಾದ ಮಾಂಬಳ ಸಾಸಿವೆ ಅನ್ನದೊಂದಿಗೆ ಬೆರೆಸಿ ಉಣ್ಣಲು ಸಿದ್ಧ.










ಮಾಂಬಳ ಸಿಹಿ ತಂಬುಳಿ


ಬೇಕಾಗುವ ವಸ್ತುಗಳು: 1 ಕಪ್ ಮಾಂಬಳ,  2 ಒಣಮೆಣಸು,  1/2 ಕಪ್ ತೆಂಗಿನ ತುರಿ, 1/2 ಕಪ್ ಬೆಲ್ಲ,  2 ಕಪ್ ಮಜ್ಜಿಗೆ,  ರುಚಿಗೆ ತಕ್ಕಷ್ಟು ಉಪ್ಪು, 1/2 ಚಮಚ ತುಪ್ಪ, 1/2 ಚಮಚ ಸಾಸಿವೆ.
ಮಾಡುವ ವಿಧಾನ: ಮಾಂಬಳವನ್ನು ಸ್ವಲ್ಪ ಹೊತ್ತು ನೀರಿನಲ್ಲಿ ನೆನೆಸಿ, ಒಣಮೆಣಸು ಹುರಿದು ಕಾಯಿತುರಿ ಸೇರಿಸಿ ರುಬ್ಬಿ ಮಾಂಬಳವನ್ನು ಬೆಲ್ಲವನ್ನು ಸೇರಿಸಿ ಪುನಹ ನುಣ್ಣಗೆ ರುಬ್ಬಿ. ಮಜ್ಜಿಗೆ ಮತ್ತು ಉಪ್ಪು ಸೇರಿಸಿ ಬೇಕಾದಷ್ಟು ತೆಳ್ಳಗೆ ಮಾಡಿ, ತುಪ್ಪದಲ್ಲಿ ಸಾಸಿವೆ ಒಗ್ಗರಣೆ ಕೊಡಿ. ಈಗ ರುಚಿಯಾದ ಪೌಷ್ಠಿಕ ಸಿಹಿ ತಂಬುಳಿಯನ್ನು ಅನ್ನದೊಂದಿಗೆ ಸವಿಯಿರಿ.







ಮಾಂಬಳ ಗೊಜ್ಜು


ಬೇಕಾಗುವ ವಸ್ತುಗಳು: 1/2 ಕಪ್ ಹೆಚ್ಚಿದ ಮಾಂಬಳ, 1 ಕಪ್ ನೀರು, 1/4 ಕಪ್ ಬೆಲ್ಲ, 1 ಹಸಿಮೆಣಸು, 1 ಚಮಚ ಎಣ್ಣೆ, 1/2 ಚಮಚ ಸಾಸಿವೆ, 1 ಒಣಮೆಣಸು, ರುಚಿಗೆ ತಕ್ಕಷ್ಟು ಉಪ್ಪು.
ಮಾಡುವ ವಿಧಾನ: ಮಾಂಬಳವನ್ನು ಸಣ್ಣಗೆ ತುಂಡು ಮಾಡಿ ನೀರಿಗೆ ಹಾಕಿ. ನಂತರ ಬೆಲ್ಲ ಉಪ್ಪು ಹಾಕಿ, ಹಸಿಮೆಣಸು ಹೆಚ್ಚಿ ಹಾಕಿ 5-10 ನಿಮಿಷ ಕುದಿಸಿ. ನಂತರ ಇಳಿಸಿ ಎಣ್ಣೆಯಲ್ಲಿ ಸಾಸಿವೆ ಒಣಮೆಣಸಿನ ಒಗ್ಗರಣೆ ಕೊಡಿ. 

ಸಿಹಿ ಜೋಳ - Sweet Corn

Sweet Corn - ಸಿಹಿ ಜೋಳ


ಸಿಹಿ ಜೋಳದಲ್ಲಿ, ಮುಸುಕಿನ ಜೋಳದಲ್ಲಿರುವ ಎಲ್ಲಾ ಪೌಷ್ಠಿಕಾಂಶಗಳಿವೆ. ತಿನ್ನಲು ರುಚಿಯಾಗಿರುವ ಈ ಜೋಳದಿಂದ ಹಲವು ಬಗೆಯ ಪೌಷ್ಠಿಕ ಸ್ವಾದಿಷ್ಟ ಅಡುಗೆಗಳನ್ನು ಮಾಡಬಹುದು.

ಸಿಹಿ ಜೋಳದ ಪಾಯಸ


ಬೇಕಾಗುವ ವಸ್ತುಗಳು: 1 ಕಪ್ ಸಿಹಿ ಜೋಳ, 1/2 ಕಪ್ ಬೆಲ್ಲ ಯಾ ಸಕ್ಕರೆ, 2-3 ಏಲಕ್ಕಿ, ಒಂದು ಟೀ ಚಮಚ ಅಕ್ಕಿ ಹಿಟ್ಟು, 1 ಕಪ್ ತೆಂಗಿನ ತುರಿ, ಚಿಟಿಕಿ ಉಪ್ಪು

ಮಾಡುವ ವಿಧಾನ: ತೆಂಗಿನ ತುರಿ ತರಿತರಿಯಾಗಿ ರುಬ್ಬಿ, ದಪ್ಪ ಹಾಲು ತೆಗೆದು ಪ್ರತ್ಯೇಕ ಇಡಿ. ನಂತರ ಪುನಹ ಸ್ವಲ್ಪ ನೀರು ಸೇರಿಸಿ ರುಬ್ಬಿ, ನೀರು ಹಾಲು ತೆಗೆದಿರಿಸಿ. ಸಿಹಿ ಜೋಳ ಮಿಕ್ಸಿಗೆ ಹಾಕಿ ನುಣ್ಣಗೆ ರುಬ್ಬಿ. ಇದಕ್ಕೆ ನೀರು ಹಾಲು, ಚಿಟಿಕಿ ಉಪ್ಪು ಹಾಕಿ ಕುದಿಸಿ. 5 ನಿಮಿಷ ಕುದಿದ ನಂತರ  ಬೆಲ್ಲ ಹಾಕಿ. ಬೆಲ್ಲ ಕರಗಿದಾಗ ಅಕ್ಕಿ ಹಿಟ್ಟು ನೀರಿನಲ್ಲಿ ಕರಗಿಸಿ ಹಾಕಿ. ಕುದಿಯಲು ಆರಂಭವಾದಾಗ ದಪ್ಪ ಹಾಲು ಮತ್ತು ಏಲಕ್ಕಿ ಪುಡಿ ಹಾಕಿ ಬೆರೆಸಿ, ಒಲೆಯಿಂದ ಕೆಳಗಿಳಿಸಿ. ಈಗ ರುಚಿಯಾದ ಪೌಷ್ಠಿಕ ಜೋಳದ ಪಾಯಸ ಸವಿಯಲು ಸಿದ್ಧ.






ಸಿಹಿ ಜೋಳದ ಉಪ್ಪಿಟ್ಟು


ಬೇಕಾಗುವ ವಸ್ತುಗಳು: 1ಕಪ್ ಉಪ್ಪಿಟ್ಟು ರವೆ, 1 ಕಪ್ ಸಿಹಿ ಜೋಳ, 2-3 ಹಸಿಮೆಣಸು, 1/4 ಕಪ್ ಕ್ಯಾರೆಟ್, 1/4 ಕಪ್ ತುಪ್ಪ, 1 ಟೀ ಚಮಚ ಸಾಸಿವೆ, 1 ಟೀ ಚಮಚ ಉದ್ದಿನ ಬೇಳೆ, 1 ಟೀ ಚಮಚ ಜೀರಿಗೆ, 2 ಕಪ್ ನೀರು, 1/4 ಕಪ್ ಸಣ್ಣಗೆ ಹೆಚ್ಚಿದ ಈರುಳ್ಳಿ, 1/2 ಕಪ್ ನಿಂಬೆಹಣ್ಣು, 1/2" ಉದ್ದದ ಶುಂಠಿ, 1 ಎಸಳು ಕರಿಬೇವಿನೆಲೆ, ರುಚಿಗೆ ಉಪ್ಪು, ಒಣಮೆಣಸು 1.

ಮಾಡುವ ವಿಧಾನ: ಬಾಣಲೆ ಒಲೆಯ ಮೇಲಿಟ್ಟು 2 ಚಮಚ ತುಪ್ಪ ಹಾಕಿ. ಬಿಸಿಯಾದಾಗ ರವೆ ಹಾಕಿ ಸ್ವಲ್ಪ ಪರಿಮಳ ಬರುವವರೆಗೆ ಹುರಿದು ಕೆಳಗಿಳಿಸಿ. ನಂತರ ಬಾಣಲೆಗೆ ಪುನಹ ತುಪ್ಪ ಹಾಕಿ ಬಿಸಿಯಾದಾಗ ಅನುಕ್ರಮವಾಗಿ ಸಾಸಿವೆ, ಉದ್ದಿನಬೇಳೆ, ಜೀರಿಗೆ, ಒಣಮೆಣಸು ಹಾಕಿ. ಇವು ಕಾದು ಸಿಡಿದಾಗ ಕರಿಬೇವು ಮತ್ತು ಈರುಳ್ಳಿ ಚೂರು ಹಾಕಿ, ನೀರು ಸೇರಿಸಿ. ಮಿಶ್ರಣ ಕುದಿಯಲು ಆರಂಭವಾದಾಗ ಹುರಿದ ರವೆ ಹಾಕಿ ತಿರುಗಿಸಿ. ಉಪ್ಪು ಹಾಕಿ ಚೆನ್ನಾಗಿ ತಿರುಗಿಸಿ. 5 ನಿಮಿಷ ಸಣ್ಣ ಉರಿಯಲ್ಲಿ ಬೇಯಲು ಮುಚ್ಚಿಡಿ. ಬೆಂದ ಮೇಲೆ ಒಲೆಯಿಂದ ಕೆಳಗಿಳಿಸಿ, ನಿಂಬೆರಸ ಬೆರೆಸಿ ಮಿಶ್ರ ಮಾಡಿ. ಈಗ ಘಮಘಮಿಸುವ ಸಿಹಿ ಜೋಳದ ಉಪ್ಪಿಟ್ಟು ಸಿದ್ಧ.





ಸಿಹಿ ಜೋಳದ ಹಲ್ವಾ



ಬೇಕಾಗುವ ವಸ್ತುಗಳು: 1 ಕಪ್ ಸಿಹಿ ಜೋಳ, 1/2 ಕಪ್ ಸಕ್ಕರೆ, 1/4 ಕಪ್ ತುಪ್ಪ, ಗೋಡಂಬಿ 7-8, ದ್ರಾಕ್ಷಿ 8-9, 1 ಚಮಚ ಏಲಕ್ಕಿ ಪುಡಿ.

ಮಾಡುವ ವಿಧಾನ: ಸಿಹಿ ಜೋಳ ಮಿಕ್ಸಿಗೆ ಹಾಕಿ ನುಣ್ಣಗೆ ರುಬ್ಬಿ. ನಂತರ ಬಾಣಲೆ ಒಲೆಯ ಮೇಲಿಟ್ಟು ರುಬ್ಬಿದ ಜೋಳದ ಮಿಶ್ರಣ ಹಾಕಿ, ಸಕ್ಕರೆ ಹಾಕಿ ತಿರುಗಿಸಿ. ಮಧ್ಯೆ ಮಧ್ಯೆ ಸ್ವಲ್ಪ ಸ್ವಲ್ಪ ತುಪ್ಪ ಸೇರಿಸಿ ತಿರುಗಿಸುತ್ತಿರಿ. ತುಪ್ಪವೆಲ್ಲಾ ಬೇರ್ಪಟ್ಟು ಹಲ್ವಾದಿಂದ ಹೊರಬರುವಾಗ ಏಲಕ್ಕಿ ಪುಡಿ ಹಾಕಿ. ನಂತರ ಬೇಕಾದ ಆಕೃತಿಗೆ ಗೆರೆ ಎಳೆದು ತುಂಡು ಮಾಡಿ, ಗೋಡಂಬಿ ದ್ರಾಕ್ಷಿಯಿಂದ ಅಲಂಕರಿಸಿ ಸವಿಯಲು ನೀಡಿ.